Á North Atlantic Seafood Forum koma saman 1100 manns úr öllum hlekkjum virðiskeðju sjávarútvegs við Norður-Atlantshafs. Laxeldi er í forgrunni flestra málstofa á ráðstefnunni, en þó eru botnfisktegundir og uppsjávarfiskur einnig til umfjöllunar.
Nokkur fjöldi Íslendinga taka þátt í ráðstefnunni og eru með hlutverk í dagskránni.
Á fyrsta degi var haldin málstofa um uppsjávartegundir, þar sem Heiðrún Marteinsdóttir frá SFS var með góða kynningu og tók svo þátt í líflegum umræðum um fiskveiðistjórnun á uppsjávartegundum í N-Atlantshafi.
Á öðrum degi stýrði Jónas R. Viðarsson sviðsstjóri hjá Matís, málstofu um tækninýungar í botnfiskveiðum og -vinnslu. Á mælendaskrá á þeirri málstofu voru fulltrúar frá Marel, BAADER, Optimar, KAPP, Greenfish og Sjókovanum, auk þess sem Jónas fjallaði um áhrif hækkandi auðlindagjalda á Íslandi á fjárfestingar í rannsóknum, nýsköpun og tækniþróun.
Á sama tíma og málstofa Jónasar fór fram stýrði Gísli Gíslason, fyrrum starfsmaður MSC, málstofu um sjálfbærni og vottanir, sem var vel sótt. Voru þar veitt sjálfbærniverðlaun, sem fyrirtækið Veramaris hlaut í þetta sinn, en fyrirtækið framleiðir omega-3 olíur með örþörungum sem sjálfbæra valkosti í fiskeldisfóður.
Íslendingar sem sóttu ráðstefnuna í þetta sinn voru færri en oft áður, en hafa hins vegar verið nokkuð vel sýnilegir í dagskránni, líkt og fyrri ár.
Meðal þess sem vekur sérstaka athygli á ráðstefnunni þetta ár eru framfarir í þorskeldi, en nokkur norsk fyrirtæki á því sviði hafa verið að kynna sinn rekstur, má þar nefna Norcod, Ode, Kimeakva og Havland en árangur þeirra vekur góðar vonir um framtíð þorskeldis.
Meðal þess sem kom fram í kynningu hjá fjármálafyrirtækinu Pareto þá hafa útflutningsverðmæti norskra sjávarafurð aukist úr 74 í 182 milljarða NOK á síðustu 10 árum, eða að jafnaði um 9% á ári. En fiskeldi stendur undir 73% af þeim verðmætum.
