Tengiliður
Björn Þór Aðalsteinsson
Verkefnastjóri
bjornth@matis.is
BruXOS miðar að því að þróa aðferð til framleiðslu verðmæta úr bruggunarhrati (korn sem búið er að meskja og fellur til við bjórframleiðslu).
Aðferðin byggir á að nota ensím sem umbreyta trefjum í hratinu í xylosa fásykrur. Ensím sem nýtt verða til verkefnisins voru nýlega skilgreind hjá Matís í tengslum við önnur rannsóknarverkefni, einkum CarboZymes. Afurðir aðferðarinnar verða tvær: xylosa fásykrur (xylooligosaccharides, XOS) og próteinríkur lífmassi sem eftir stendur eftir útskilnað sykranna. Xylosa fásykrur eru eftirsótt afurð sem notuð er sem aukaefni í matvæli og sem fæðubótarefni. Þær breyta bragð- og áferðareiginleikum matvæla og hafa s.k. prebiotic áhrif – hvetja til vaxtar heilbrigðrar örveruflóru í meltingarvegi. Lífmassinn er ákjósanlegur til nýtingar í fóðurgerð.
BruXOS hefur hlotið fjármögnun úr Matvælasjóði, Keldu, í tvígang – úr úthlutun árin 2021 og 2022. Auk þróunar fyrrgreindrar aðferðar, þá felur verkefnið í sér uppskölun á framleiðslu-ferlinum, framleiðslu á afurðunum tveimur (XOS og próteinum), og notkun þeirra til íblöndunar í matvæli (XOS) og fiska-fóðurs (prótein). Loks verður skynmat framkvæmt á matvælunum sem innihalda XOS og á fiski sem alinn hefur verið með fóðrinu.