Einangrun, vatnsrof og lífvirkni kollagens úr þorskroði / Isolation, hydrolysation and bioactive properties of collagen from cod skin

Rannsóknir hafa sýnt fram á að kollagen peptíð hafa ýmsa lífvirkni. Jákvæðar niðurstöður hafa fengist úr rannsóknum á mönnum, sérstaklega tengdar jákvæðum áhrifum á liði. Kollagen er aðallega framleitt úr nauta- og svínaskinni en það er markaður fyrir kollageni úr öðrum afurðum t.d. fiskafurðum.

Heildar markmið verkefnisins var að framleiða verðmæta vöru úr þorskroði. Miklu magni af þorskroði og öðrum hliðarafurðum er hent árlega og er því mikilvægt að finna lausn til að minnka það magn og sérstaklega vegna þess að roðið inniheldur mikið magn næringarefna.

Markmið þessa verkefnisins má skipta upp í þrjú skref. Fyrsta skrefið var að setja upp aðferð til þess að einangra kollagen úr þorskroði með góðum heimtum, annað skrefið var að vatnsrjúfa kollagen með mismunandi ensímum til þess að fá sem hæst DH gildi og þriðja skrefið var að mæla lífvirkni kollagen peptíða. Markmiðið var að athuga hvaða áhrif mismunandi DH gildi höfðu á lífvirknina. Ensímin sem voru valin í vatnsrofið voru: Alcalase, Flavourzyme, Neutrase, Protamex, Tail-37 and TZ-02-L og lífvirknimælingarnar sem voru gerðar: ACE-inhibiting, elastase-inhibiting, Metal Chelating, ORAC and Reducing power.

Einangrunarskrefið var árangursríkt og kollagen var einangrað úr þorskroðinu með góðum heimtum. Kollagenið var vatnsrofið með mismunandi ensímum og tegund og hlutfall ensíma hafði áhrif á stig vatnsrofs og lífvirkni. Niðurstöðurnar sýndu fram á lág gildi í andoxunarmælingum en niðurstöðurnar sýndu einnig fram á að kollagen úr þorskroði geti haft hamlandi áhrif á elastase og haft góð áhrif á húðina.

Skrunaðu efst