Höfundur: admin

Norrænt samstarf er Íslendingum mikilvægt. Hið norræna eldhús er einn vettvangur norræns samstarfs, þar kennir margra grasa. Í síðustu viku greindu Bændasamtök Íslands frá norrænu matarverðlaununum Emblu hvar óskað er eftir tilnefningum í sjö flokka fram til 17. apríl. Tveimur dögum síðar eða 19. apríl renna út frestir til að senda inn verkefnahugmyndir til skrifstofu norræna ráðherraráðsins  sem ganga annarsvegar út á mat fyrir æskublóma Norðurlandanna og hinsvegar út á mörkun/ kynningu norrænar matarmenningar og gildum hennar.  

Ný norræn matargerð er áætlun undir Norrænu ráðherranefndinni. Markmið áætlunarinnar er að færa hugmyndafræði norrænnar matargerðar inn á heimili og stofnanir á Norðurlöndunum og hvetja til nýsköpunar í vöruþróun á matvælum og staðbundinnar matvælaframleiðslu. Áætlunin vísar í hina nýju norrænu matar stefnuyfirlýsingu frá árinu 2004.

Samtök norrænna bændasamtaka komust að samkomulagi um að efna til norræna matarverðlauna sem bera heitið Embla. Til stendur að Embla verði afhent annað hvert ár, fyrsta afhendingin verður í Danmörku árið 2017 í boði dönsku bændasamtakanna Landbrug & Fødevarer. Mun verðlaunaafhendingin fara fram á ráðstefnu danska umhverfis- og matvælaráðuneytisins „Better Food for More People“ á Copenhagen Cooking í ágúst n.k. Ætlunin er að „hampa þeim sem ekki ráðast á garðinn þar sem hann er lægstur. Þeim sem leggja kræsingar á borð okkar allra. Þeim sem leggja allt í sölurnar og storka hinu hefðbundna. Þeim sem glæða hið norræna eldhús lífi og auðga matargerðarlistina eins og hún leggur sig. Þeim sem færa okkur norrænt eldhús á silfurfati svo okkur hungrar öll í meira.“

Norræn matargerð, matarmenning og gildi hennar eru oft á tíðum í hávegum höfð alþjóðlega.
Oft er litið á Norðurlöndin sem einn markað, til að stuðla áfram að jákvæðri þróun og til að laða að fleiri gesti að Norðurlöndum þarf áframhaldandi norrænt samstarf um þróun þekkingar og mörkun norrænnar matarmenningu á alþjóðavettvangi. Leitað er að verkefnum sem byggja á sterku norrænu samstarfi sem leitt geta kynningu nýrrar norrænnar matargerðar.

Jafnframt er auglýst eftir verkefnum sem miða að því að tengja gleði við mat og skapa þekkingu á mat og neyslu og færni við matreiðlsu hjá börnum og ungmennum á Norðurlöndum sem og að vekja áhuga þeirra á norrænum mat. 

Áhugasamir aðilar eru hvattir til að láta málin sig varða.

Hin nýju, norrænu matarverðlaun Embla hampa því sem skarar fram úr í hinu norræna eldhúsi: hráefni, matvælum, framleiðsluaðferðum og fólkinu á bak við allt saman. Markmiðið með verðlaununum er að deila þekkingu og reynslu og vekja athygli á norrænum mat.

Þann 14. mars ýta norræn landbúnaðarsamtök, sameinuð undir Samtökum norrænna bændasamtaka (NBC), úr vör fyrstu samnorrænu matarverðlaununum. Hin nýju verðlaun hafa hlotið heitið Embla, en samkvæmt norrænni goðafræði bar fyrsta konan það nafn.

Emblu er ætlað að efla samnorræna matarmenningu og einkenni hennar ásamt því að auka áhuga á norrænum mat utan Norðurlandanna. Verðlaunin njóta styrks Norrænu ráðherranefndarinnar en Bændasamtök Íslands halda utan um þátttöku Íslands í keppninni.

„Við höfum svo margt gott á Norðurlöndum. Bragðgott hráefni og öfluga nýsköpun á meðal fagfólks í matvælaiðnaði. Við njótum öll góðs af því að deila þessum sögum hvert með öðru,“ segir Andreas Buchhave, ráðgjafi hjá dönsku bændasamtökunum Landbrug & Fødevarer og verkefnisstjóri hinna nýju, norrænu matvælaverðlauna.

„Það er mikill styrkur fyrir Emblu, ímynd verðlaunanna og markmið þeirra, að þeim sé stýrt af samtökum með breiða skírskotun til norrænna matvæla,“ segir Mads Frederik Fischer-Møller, ráðgjafi hjá Norrænu ráðherranefndinni.

Embla verður afhent annað hvert ár, í fyrsta sinn í Kaupmannahöfn í ágúst 2017 í boði Landbrug & Fødevarer. Við athöfnina verður tilkynnt hvar Embla verður afhent næst, árið 2019.

Verðlaunaafhendingin verður í samstarfi við ráðstefnu danska umhverfis- og matvælaráðuneytisins, „Better Food for More People“ á matarhátíðinni Copenhagen Cooking.

„Með þessu móti verða til samlegðaráhrif þar sem Embla styður við innlendan viðburð og nýtur um leið góðs af þeirri athygli sem hann fær þar sem áherslan er á mat,“ segir Jan Laustsen, framkvæmdastjóri hjá Landbrug & Fødevarer.

Embla skiptist í sjö flokka þar sem einn er tilnefndur frá hverju landi á Norðurlöndunum. Þriggja manna dómnefnd kemur frá hverju landi sem velur keppendur og einnig verður sameiginleg dómnefnd sem sker úr um hver hinna tilnefndu vinnur til verðlaunanna.  

Verðlaunaflokkar Emblu eru sjö talsins

Á vefsíðunni emblafoodaward.com er tekið við tilnefningum í sjö flokka sem eru:

• Matvælaiðnaðarmaður Norðurlanda 2017
• Hráefnisframleiðandi Norðurlanda 2017
• Norðurlandaverðlaun fyrir mat fyrir marga 2017
• Matarblaðamaður Norðurlanda 2017
• Mataráfangastaður Norðurlanda 2017
• Matvælafrumkvöðull Norðurlanda 2017
• Norðurlandaverðlaun fyrir mat fyrir börn og ungmenni 2017.

Hægt er að skrá þátttakendur í Emblu frá 14. mars til 17. apríl 2017. Skráningareyðublöð fyrir flokkana sjö er að finna á www.emblafoodaward.com , en þar má einnig fræðast betur um verðlaunin og tilurð þeirra.

Nánari upplýsingar veitir Tjörvi Bjarnason, sviðsstjóri útgáfu- & kynningarsviðs Bændasamtaka Íslands, í netfangið tjorvi@bondi.is og í síma 862-3412.

Á vefsíðunni má finna myndefni fyrir fjölmiðla: http://is.emblafoodaward.com/#5

HB Grandi er samstarfsaðili World Seafood Congress 2017 (#WSC_2017). Ráðstefnan fer fram á Íslandi í september og er þetta í fyrsta sinn sem viðburðurinn fer fram á Norðurlöndum. Stofnað var til ráðstefnunnar að frumkvæði Matvæla- og landbúnaðarstofnunar sameinuðu þjóðanna (FAO).

WSC er einn stærsti viðræðuvettvangur í heimi á sviði verðmætasköpunar í sjávarútvegi og matvælaöryggis. Á ráðstefnuna koma starfsmenn útgerða og fiskvinnsla, fjárfestar og sérfræðingar úr stjórnkerfi, rannsókna- og menntaumhverfinu frá öllum heimshornum.

„HB Grandi er framsækið sjávarútvegsfyrirtæki sem Matís hefur lengi unnið með í rannsókna- og nýsköpunarverkefnum. Við erum virkilega ánægð með að fá fyrirtækið til samstarfs á vettvangi ráðstefnunnar, sem mun gefa tækifæri á að kynna íslenskan sjávarútveg og nýsköpunarkraftinn sem hann hefur yfir að ráða“ sagði Sveinn Margeirsson, forstjóri Matís aðspurður af þessu tilefni. 

„Það er okkur sannur heiður að styðja við umræðu um matvælaöryggi og verðmætasköpun í sjávarútvegi. HB Grandi hefur um árabil stutt ábyrga nýtingu fiskistofna og tekið þátt í þróunar- og nýsköpunarverkefnum með það að markmiði að nýta sjávarauðlindina við Ísland sem best. World Seafood Congress er mikilvægur umræðuvettvangur um framþróun í allri virðiskeðju sjávarafurða og um þróun sjávarútvegs um allan heim,“ sagði Vilhjálmur Vilhjálmsson forstjóri HB Granda.

Nánari upplýsingar um ráðstefnuna má finna á heimasíðunni www.wsc2017.com

Í dag, 13. mars 2017, hefst ráðstefnan Strandbúnaður 2017. Strandbúnaður, sem er nýyrði, sem samheiti atvinnugreina sem tengjast nýtingu land- og/eða sjávargæða í og við strandlengju landsins, þ.m.t. ræktun og eldi. Af því tilefni ritaði Arnljótur Bjarki Bergsson, sviðsstjóri Innleiðingar og áhrifa, eftirfarandi grein í Morgunblaðið, sem birtist í dag.

Íslendingar standa, rétt eins og aðrir jarðarbúar, frammi fyrir miklum áskorunum. Óvíst er með hvaða hætti glíman við hinar miklu áskoranir kann að hafa áhrif á samfélag okkar, velferð og velsæld. Jarðarbúum fjölgar ört, það er staðreynd sem setur kvöð á mannkynið að nýta betur þau hráefni sem unnið er úr og framleiða eftir fremsta megni með sjálfbærum hætti.

Matvælaframleiðsla er meðal þýðingarmeiri verkefna sem huga þarf að þegar kemur að úrlausn hinna stóru áskoranna. Um alllangt skeið hefur innan við 5% af heildar matvælaframleiðslu heimsins komið úr höfum og vötnum, þó svo þau þeki um 70% af yfirborði jarðarinnar. Æ fleiri beina nú sjónum sínum að þessari staðreynd, því líklegt er að nokkur hluti fyrirsjáanlegrar aukningar matvælaframleiðslu heimsins fari fram við og fyrir ströndum meginlanda sem og eyríkja. Landbúnaður er fyrirferðamikill í matvælaframleiðslu heimsins og margfalt umfangsmeiri en veiðar eða nytjar villtra fiskistofna. Efnahagslögsaga Íslands er víðfeðm og ljóst er að möguleikar eru á að framleiða matvæli innan hennar auk veiða á villtum tegundum. Strandríkið Ísland býr að tækifærum með agaðri og skipulagðri uppbyggingu atvinnugreina við strendur landsins.

Ræktun lífvera í vatni er ekki ný af nálinni en hvorki ræktun né eldi hefur verið fyrirferðamikið á Íslandi, þó Ísland sé leiðandi í bleikjueldi og hafi verið framarlega í eldi á lúðu. Á síðustu árum hefur verið mikil aukning í laxeldi við Íslandsstrendur og efnileg fyrirtæki í þörungaræktun hafa sprottið upp. Þá hefur gróska verið í ræktun hryggleysingja og skel hefur sést á matseðlum víða um land. Mikilvægt er að vanda vel til verka við uppbyggingu atvinnugreina hér á landi. Atvinnugreinar sem byggja á hagnýtingu auðlinda á og við strendur landsins geta liðkað til við lausn þeirra áskorana sem við okkur blasa.

Strandbúnaður er samheiti yfir atvinnugreinar sem tengjast nýtingu land- og/eða sjávargæða í og við strandlengju landsins, hvort sem um ræktun eða eldi er að ræða.

Fyrir ábyrga þróun þeirra atvinnugreina sem teljast til strandbúnaðar er mikilvægt að fyrir hendi sé opinn vettvangur fyrir faglega og fræðandi rökræðu um brýnustu og mikilvægustu úrlausnarefnin. Í því augnamiði er efnt til ráðstefnunnar Strandbúnaður 2017 dagana 13.-14. mars á Grand Hótel. Ráðstefnan er öllum opin, þar verður farið yfir, á skilgreindum málstofum, stöðu og þróun fyrirferðamestu þátta strandbúnaðar við Ísland sem og stöðu mála á heimsvísu. Ráðstefnan styður þannig við menntun, rannsóknir, stefnumótun og þar með þróun greinarinnar.

Matvælastofnun heldur fund um eftirlitskerfi stofnunarinnar kl. 9-12 föstudaginn 17. mars í Reykjavík. Fundurinn er öllum opinn en er sérstaklega ætlaður matvælaframleiðendum sem stofnunin hefur eftirlit með, bændum sem og fyrirtækjum, til að fara yfir framkvæmd eftirlits, eftirfylgni og birtingu niðurstaðna úr eftirliti.

Á fundinum verður fjallað um uppbyggingu og nýlegar breytingar á skoðunarhandbókum Matvælastofnunar og áhættuflokkun fyrirtækja. Farið verður yfir forsendur og framkvæmd eftirlits og frammistöðuflokkun Matvælastofnunar á fyrirtækjum út frá niðurstöðum eftirlits. Verklag stofnunarinnar við beitingu þvingunar- og refsiúrræða verður kynnt, ásamt upplýsingagjöf út á við um niðurstöður eftirlits og aðgerðir Matvælastofnunar.

Dagskrá

09:00 – 10:00    Skoðunarhandbækur Matvælastofnunar – Jón Ágúst Gunnlaugsson, MAST
10:00 – 10:25    Áhættuflokkun fyrirtækja – Jónína Stefánsdóttir, MAST
10:25 – 10:40    Hlé
10:40 – 10:55    Frammistöðumat á fyrirtækjum – Jón Ágúst Gunnlaugsson, MAST
10:55 – 11:40    Eftirfylgni og beiting þvingunar- og refsiúrræða – Ástfríður Sigurðardóttir, MAST
11:40 – 12:00    Birting á niðurstöðum eftirlits – Jón Ágúst Gunnlaugsson, MAST
 
Fundargestum gefst kostur á að koma spurningum sínum á framfæri og taka þátt í umræðum. Þátttakendur þurfa ekki að skrá sig og er þátttakan þeim að kostnaðarlausu.
 
Fundurinn er föstudaginn 17. mars kl. 9:00 – 12:00 hjá Markaðsstofu Matvælastofnunar að Stórhöfða 23. Gengið er inn í húsnæði stofnunarinnar að norðanverðu (Grafarvogsmegin). Nánari upplýsingar má fnna á vef Matvælastofnunar. 

Ítarefni: Ekki ruglast! Matís er ekki Matvís sem er ekki MAST…..

Laust er til umsóknar 100% starf lektors í  matvælafræði við Matvæla- og næringarfræðideild Háskóla Íslands.

Fagsvið: 

Leitað er eftir umsækjanda með þekkingu og reynslu til að efla rannsóknir og kennslu í matvælafræði með áherslu á matvælaefnafræði, matvælavinnslu eða matvælaörverufræði.

Starfssvið:

• Að taka þátt í þróun og kennslu í grunn, meistara- og doktorsnáms í matvælafræði.
• Að kenna og leiðbeina nemendum í matvælafræði.
• Að stunda rannsóknir á sviði matvælafræði.
• Að taka þátt í stjórnun og uppbyggingu kennslu og rannsókna.
• Að afla utanaðkomandi rannsóknarstyrkja og taka virkan þátt í innlendum og alþjóðlegum verkefnum og samstarfi.

Menntunar- og hæfniskröfur:

• Doktorspróf með sérhæfingu í matvælafræði.  Sérhæfingin getur m.a. verið á sviðum matvælaefnafræði, matvælalíftækni, matvælavinnslu eða matvælaörverufræði.
• Reynsla af umsjón rannsóknaverkefna, skýrar rannsóknaáherslur og reynsla í öflun vísindastyrkja.
• Kennslureynsla á háskólastigi með góðum árangri sem og reynsla í leiðbeiningu framhaldsnema.
• Framúrskarandi enskukunnátta.
• Góð samstarfshæfni og lipurð í mannlegum samskiptum.
• Áreiðanleiki, frumkvæði og sjálfstæði í vinnubrögðum, ásamt góðri færni í að miðla eigin þekkingu.

Við ráðningu verður miðað við að sá er starfið hlýtur falli sem best að aðstæðum og þörfum Matvæla- og næringarfræðideildar.

Ráðið verður í starfið til fimm ára með möguleika á ótímabundinni ráðningu að þeim tíma liðnum sbr. 3. mgr. 31. gr. reglna fyrir Háskóla Íslands nr. 569/2009.

Um meðferð umsókna, mat á hæfi umsækjenda og ráðningu í starfið er farið eftir ákvæðum laga um opinbera háskóla nr. 85/2008 og reglna fyrir Háskóla Íslands nr. 569/2009.

Samkvæmt reglum Háskóla Íslands nr. 569/2009, 38. gr. er rektor heimilt að veita framgang í starf dósents eða prófessors við nýráðningu uppfylli viðkomandi þau skilyrði.

Umsóknarferli:

Umsóknarfrestur er til og með 6. mars 2017 og skulu umsóknir berast á rafrænu formi á netfangið bmz@hi.is merkt HI17010159.

Umsækjendur skulu láta fylgja umsókn sinni vottorð um námsferil sinn og störf, ritaskrá, skýrslu um vísindastörf og önnur störf sem þeir hafa unnið og rannsóknaráætlun ef til ráðningar kemur. Í umsókn skal koma fram hver ritverka sinna, allt að átta talsins, umsækjandi telur veigamest með tilliti til þess starfs sem um ræðir. Umsækjandi sendir eingöngu þessi ritverk sín með umsókn, eða vísar til þess hvar þau eru aðgengileg á rafrænu formi. Þegar fleiri en einn höfundur stendur að innsendu ritverki skulu umsækjendur gera grein fyrir framlagi sínu til verksins. Enn fremur er ætlast til þess að umsækjendur láti fylgja með umsagnir um kennslu- og stjórnunarstörf sín, eftir því sem við á. Ef ekki er unnt að skila fylgigögnum með umsókn á rafrænu formi skal skila þeim í tvíriti til vísindasviðs Háskóla Íslands, Sæmundargötu 2, 101 Reykjavík. Öllum umsækjendum verður svarað og þeim tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknarfrests.

Laun eru skv. kjarasamningi Félags háskólakennara og fjármálaráðherra.

Gert er ráð fyrir að ofangreint starf verði veitt frá 1. ágúst 2017 eða eftir samkomulagi, enda verði störfum nefnda, sem um málið fjalla, þá lokið. Umsækjendum verður greint frá niðurstöðum dómnefndar og valnefndar og um ráðstöfun starfsins þegar sú ákvörðun liggur fyrir.

Nánari upplýsingar veita:

• Guðjón Þorkelsson, forseti Matvæla- og næringarfræðideildar og starfsmaður Matís (gudjont@hi.is / s. 422 5044)
• Auður Ingólfsdóttir, deildarstjóri Matvæla- og næringarfræðideildar (auduring@hi.is / 543 8408).

Við ráðningu í störf í Háskóla Íslands er tekið mið af jafnréttisáætlun skólans.

Matvælafræði- og næringarfræðideild er ein af sex deildum Heilbrigðisvísindasviðs Háskóla Íslands. Við deildina stunda um 120 stúdentar nám í matvælafræði og næringarfræði. Þar af eru um 50 framhaldsnemar, bæði í meistaranámi og doktorsnámi.  Akademísk stöðugildi innan deildarinnar eru átta og vegna hás meðalaldurs matvælafræðikennara er gert ráð fyrir verulegri endurnýjun starfliðs á  næstu árum. Því eru ungir vísandamenn sérstaklega hvattir til að sækja um.  Deildin er í rannsókna- og kennslusamstarfi við Rannsóknastofu í næringarfræði (www.rin.hi.is) og Matís ohf (www.matis.is).

Nánari upplýsingar um deildina má finna á vef fræðasviðsins
http://www.hi.is/matvaela_og_naeringarfraedideild/forsida

Ráðstefnan Strandbúnaður 2017 verður haldin á Grand Hótel 13. og 14. mars n.k. Heiti ráðstefnunar vísar til þess að Strandbúnaður er samheiti yfir atvinnugreinar sem tengjast nýtingu land- og/eða sjávargæða í og við strandlengju landsins, hvort sem um ræktun eða eldi er að ræða. Tilgangurinn er að stuðla að faglegri og fræðandi umfjöllun um strandbúnað og styðja þannig við menntun, rannsóknir, þróun og stefnumótun atvinnugreinanna sem hagnýta land og eða sjávar gæði við strandlengju landsins

Á ráðstefnunni verður sérstaklega vikið að mikilvægi menntunar fyrir atvinnugrein í vexti. Ein af átta málstofum ráðstefnunnar ber heitið Menntun í Strandbúnaði. Enda eru þekking og færni meðal mikilvægustu grunnþátta sem huga þarf að og hagnýta má við uppbyggingu á nýjum atvinnugreinum.

Strandbúnaður er atvinnugrein sem vex og dafnar með hagnýtingu þekkingar fjölmargra fræðasviða. Mikilvægt er að þekkingu sé miðlað á skilvirkan hátt til atvinnulífs og samfélags svo hagnýting hennar verði sem best. Menntun einstaklinga til fjölbreyttra starfa tengdum strandbúnaði er lykill að aukinni samkeppnishæfni greinarinnar. Í málstofunni verður framboð menntunar í strandbúnaði á Íslandi kynnt, óskir atvinnugreinarinnar um frekari þróun hennar ræddar sem og væntingar og viðhorf einstaklinga til náms og starfsumhverfis. 

Erindi á málstofunni um menntun í Strandbúnaði koma frá Arnarlaxi, Keynatura, Arctic Fish, Háskólanum á Hólum, Háskólanum á Akureyri og Háskólasetri Vestfjarða. Þessir aðilar eru taldir mjög hæfir til að fjalla um stöðu og framtíðarsýn menntunar í fiskeldi, samspil menntunar og þróunar strandbúnaðar og þátt menntunar í fiskeldi í styrkingu strandbyggða. 

Á öðrum sviðum Strandbúnaðar má nefna nokkur dæmi um einkaráhugaverð umræðuefni. Ræktun bláskeljar og þá sérstaklega heilnæmi íslenskrar bláskeljar er nokkuð sem er vert að draga fram í dagsljósið. Þörungarækt og nýting þörunga og þá sérstaklega m.t.t. vinnslu og vöruþróunarmöguleika. Í umræðu um framtíð laxeldis verður farið yfir þátt fóðurframleiðslu og fóðurþróunar með tilliti til umhverfisins.

Áhugasamir eru hvattir til að skrá sig til þátttöku á ráðstefnunni hér.

Matís og Geitfjárræktarfélag Íslands, lýstu yfir vilja til aukins samstarfs, með aukna verðmætasköpun, vöruþróun og kynningu á geitaafurðum að markmiði fyrr í vikunni.

Matís og Geitfjárræktarfélagið telja að auknar rannsóknir í tengslum við ræktun geitarinnar, beiting upplýsinga- og líftækni og kynning á geitinni geti lagt grunninn að breyttum hugsunarhætti varðandi nýsköpun og tækniumbyltingar í landbúnaði á Íslandi, aukið framleiðslu heilnæmra og næringarríkra matvæla og um leið stuðlað að nýtingu matarafganga og aukahráefna sem í dag falla til sem úrgangur úr matvælaiðnaði, af veitingahúsum og heimilum. 

Geitin hefur verið hluti af íslenska lífhagkerfinu frá landnámi og er ein af erfðaauðlindum þjóðarinnar.  Mjólk, kjöt, skinn  og ull geitarinnar hafa verið nýtt frá landnámi og ýmsar geitaafurðir, s.s. hafurseistu, geitalifur og geitahland hafa verið sett í samhengi við lækningamátt lífauðlinda.

Matís hefur á síðustu árum náð mjög góðum árangri í sókn í alþjóðlega rannsókna- og nýsköpunarsjóði, í samstarfi við íslensk og erlend fyrirtæki og stofnanir.  Matís mun leitast við að kynna íslensku geitina og möguleika til nýsköpunar henni tengdri fyrir samstarfsaðilum sínum innanlands sem utan.

Á tímum áskorana á sviði fæðuöryggis, næringaröryggis og lýðheilsu og mikilla breytinga í lýðfræði um gjörvallan heim er mikilvægt að horfa með nýjum hætti á nýtingu erfðaauðlinda Íslendinga og menningararfs tengdum landbúnaði, möguleika til landbúnaðar í og nærri þéttbýli og nýtingu alþjóðlegrar tækni-og markaðsþekkingar til aukinnar verðmætasköpunar og bættar lýðheilsu.  Notendamiðuð hönnun vara og þjónustu, með sjálfbæra þróun að leiðarljósi, eru grundvallaratriði í þessu samhengi.

Geitfjárræktarfélag Íslands var stofnað árið 1991. Félagið er hagsmunasamtök geitfjárræktenda á Íslandi, en alls eru ríflega 1000 vetrarfóðraðar geitur – hafrar og huðnur – á Íslandi. Hlutverk félagsins er að stuðla að verndun og ræktun íslenska geitfjárstofnsins og leita leiða til að bæta nýtingu og auka verðmæti geitaafurða.

Matís er öflugt þekkingarfyrirtæki sem sinnir fjölbreyttu rannsókna- þjónustu- og nýsköpunarstarfi í matvæla- og líftækniiðnaði, með aukna verðmætasköpun, bætt matvælaöryggi og bætta lýðheilsu að markmiði.