Tengiliður
Björn Þór Aðalsteinsson
Verkefnastjóri
bjornth@matis.is
Markmið CAZyme-X verkefnisins er að bera kennsl á og skilgreina sykruensím (CAZymes) af áður óþekktri byggingu og virkni sem brjóta niður fjölsykrur stórþörunga.
Fáum ensímum sem brjóta niður fjölsykrur stórþörunga hefur verið lýst til þessa. Það felur í sér tækifæri til uppgötvana. Skilgreining slíkra ensíma myndi varpa ljósi á hringrás næringarefna í sjó; efnaskipta-getu örvera; hlutverk gena sem hafa áður óþekkta virkni; og myndi skapa frekari grundvöll til líftæknilegrar hagnýtingar stórþörunga. Gen sykruensíma sem brjóta niður flóknar fjölsykrur eru gjarnan staðsett í þyrpingum (e. gene cluster) í erfðamengjum örvera. Slíkar þyrpingar innihalda gjarnan fjölda gena sem hafa óskilgreinda virkni, en staðsetning þeirra í þyrpingum af þessum toga bendir til að þau hafi virkni í niðurbroti fjölsykra. Í verkefninu munum við bera kennsl á þyrpingar sykruensíma í umhverfis erfðamengjum sem við höfum sótt og raðgreint, og eru mjög auðug af sykruensímum; leita gena í þyrpingunum sem hafa óskilgreinda virkni, klóna þau, tjá og skilgreina virkni þeirra – í leit nýrra sykruensíma.