Kjötmat þjónar mikilvægum tilgangi enda byggir verðmat á innleggi bænda á niðurstöðum þess. Kjötmatsgögn eru mikilvæg í kynbótastarfi enda kjötmatsniðurstöður nýttar til útreikninga á kynbótamati. Þá getur kjötmatið einnig verið nýtt í viðskiptum með kjöt t.d. milli afurðastöðva og kjötvinnslna. Það er afar mikilvægt að kjötmatið sé staðlað og að samræmi milli kjötmatsmanna, sláturhúsa og tímabila sé sem best. Því er mikill ávinningur fyrir bændur og afurðastöðvar ef tækist að koma á hlutlægu mati fyrir holdfyllingu.
Kjötmat sauðfjár og nautgripa á Íslandi byggir á svo kölluðu EUROP kjötmatskerfi. Þessi aðferð var tekin upp hér á landi haustið 1998 við sauðfjárslátrun. Skrokkar eru annarsvegar flokkaðir í holdfyllingarflokka og hinsvegar í fituflokka. Holdfyllingarflokkunin byggir alfarið á huglægu mati en fitumatið byggir á fitumælingu. Verkefnið snýst um að gera samanburðarrannsókn á núgildandi EUROP kjötmati lambakjöts í sláturhúsum, með núverandi aðferð (huglægt mat) og með hlutlægri aðferð sem byggir m.a. á lengdarmælingu. Tekin hefur verið upp aðferð í norskum sláturhúsum, sem metur holdfyllingu skrokka með lengdarmælingum ásamt upplýsingum um fituflokk og þunga. Kanna verður hvort sú aðferð skili fullnægjandi upplýsingum um gæði og gæti komið í stað núverandi matsaðferðar hér á landi. Ávinningurinn væri samræmt hlutlægt mat í sláturhúsum á íslandi.
Í verkefninu verða mæliniðurstöður heildargæða, vöðvahlutfalls og erfðastuðla rannsakaðar.
