Höfundur: admin

Mánudaginn 18. maí mun starfsmaður Matís, Hrönn Ólína Jörundsdóttir, flytja fyrirlestur um mengandi efni í íslensku lífríki. Fyrirlesturinn verður haldinn í húsakynnum Matís að Borgartúni 21, 2. h.v. og hefst kl. 11:30. Allir velkomnir á meðan húsrúm leyfir.

Hrönn Ólína Jörundsdóttir varði doktorsritgerð sína “Útbreiðsla og breytingar í magni þrávirkrar lífrænnar mengunar í langvíueggjum frá Norðvestur Evrópu” (Temporal and spatial trends of organohalogens in guillemot (Uria aalge) in North Western Europe) þann 6. febrúar 2009 við Umhverfisefnafræðideild Stokkhólmsháskóla.

Ritgerðin fjallar í stórum dráttum um þrávirka lífræna mengun á Norðurlöndunum, t.d. PCB og skordýraeitrið DDT ásamt niðurbrotsefnum þeirra, sem mæld voru aðalega í langvíueggjum. Efnin voru mæld í eggjum frá Íslandi, Færeyjum, Noregi og Svíþjóð til að fá landfræðilegan samanburð.

Niðurstöður sýna að lífríki Norður Atlantshafsins er minna mengað en lífríki Eystrasaltsins, en þó reyndust ýmiss mengandi efni vera í svipuðum styrk á þessum svæðum og þarf að rannsaka nánar af hverju það stafar. Flúoreruð alkanefni, sem koma m.a. úr útivistarfatnaði, hafa nýlega fundist í umtalsverðu magni í náttúrunni mældust í langvíueggjum frá Íslandi, Færeyjum, Noregi og Svíþjóð og voru í einstaka tilfellum í hærri styrk í eggjum frá N-Atlantshafi en í Eystrasaltinu. Brómeruð eldvarnarefni, sem m.a. eru notuð í raftæki, voru allstaðar mælanleg og virðist vera hægt að greina mismunandi uppruna efnanna sem berast til Norður Atlantshafsins, annars vegar frá N-Ameríku og hins vegar frá Evrópu.

Einnig var gerður samanburður á magni mengandi efna í sjö íslenskum fuglategundum, þ.e. kríu, æðarfugli, langvíu, fýl, sílamáfi, svartbak og skúmi. Skúmurinn reyndist hafa umtalsvert háan styrk mengandi efna, m.a. PCB sambanda og skordýraeitursins DDT, og er mikilvægt að rannsaka heilsuástand skúmsins.

Ljóst er að hluti þeirrar mengunar sem mælist í íslensku lífríki berst með haf- og loftstraumum til Íslands en hins vegar er umtalsverður hluti tilkominn vegna notkunar Íslendinga á varningi sem inniheldur margvísleg mengandi efni.

Frekari upplýsingar veitir Hrönn, hronn.o.jorundsdottir@matis.is.

Doktorsvörn fer fram við Matvæla-og næringarfræðideild Háskóla Íslands, föstudaginn 8. maí kl. 13. Þá ver Hólmfríður Sveinsdóttir næringarfræðingur doktorsritgerð sína „Rannsóknir á breytileika próteintjáningar í þorsklirfum með aldri og sem viðbrögð við umhverfisþáttum“.

Andmælendur eru Dr. Albert Imsland, prófessor við Háskólann í Bergen í Noregi og Dr. Phillip Cash, rannsóknaprófessor við Háskólann í Aberdeen í Skotlandi. Leiðbeinandi í verkefninu var Dr. Ágústa Guðmundsdóttir. Dr. Inga Þórsdóttir, forseti Matvæla- og næringarfræðideildar, stjórnar athöfninni sem fer fram í Hátíðasal, Háskóla Íslands.

Ágrip af rannsókn
Rannsóknir sýna að unnt er að auka heilbrigði fisklirfa með ýmsum umhverfisþáttum eins og próteinmeltu og bætibakteríum. Í doktorsverkefninu voru próteinmengjagreiningar notaðar til að fylgjast með breytingum á próteinmengi þorsklirfa með auknum þroska og sem viðbrögð við próteinmeltu- og bætibakteríumeðhöndlun. Áhersla var lögð á greiningu meltingarensímsins trypsíns auk próteina sem tengja má við þroska og ósérhæft ónæmissvar. Niðurstöður rannsóknanna eru kynntar í 5 vísindagreinum og einum bókarkafla. Í ljós kom að trypsín er í lágmarki við upphaf fæðunáms en þá má ætla að mikil þörf sé á meltingu próteina.

Umtalsverðar breytingar urðu á magni og afbrigðum fjölda próteina í próteinmengi lirfanna með auknum þroska og sýndu keratín afbrigði mestar aldursháðar breytingar. Helstu prótein, sem greind voru í minna magni í próteinmengi þorsklirfa eftir meðhöndlun með bætibakteríum má tengja við ósérvirkt ónæmissvar. Meirihluti þeirra próteina sem greindust í auknu magni eftir meðhöndlun þorsklirfa með próteinmeltu má tengja við orkubúskap þeirra. Tvö trypsín afbrigði fundust í próteinmengi þorsklirfa. Enginn munur var á magni þessara tveggja trypsín afbrigða í þorsklirfum eftir meðhöndlun þeirra með bætibakteríum eða próteinmeltu.

Helstu niðurstöður
Niðurstöður doktorsverkefnisins eru fyrsta skrefið í uppbyggingu á gagnabanka fyrir próteinmengi þorsklirfa. Þær hafa að geyma mikilvægar upplýsingar um breytileika próteina í próteinmengi þorsklirfa með auknum þroska og sem viðbrögð við breytingum á umhverfisþáttum. Verkefnið var unnið í nánu samstarfi við Raunvísindastofnun Háskólans. Aðrir samstarfsaðilar voru Háskólinn á Hólum, Hafrannsóknastofnun og Háskólinn í Aberdeen í Skotlandi. Leiðbeinandi doktorsverkefnisins var Dr. Ágústa Guðmundsdóttir, prófessor en auk hennar sátu í doktorsnefnd þau Dr. Bjarnheiður K. Guðmundsdóttir, sérfræðingur við Tilraunastöð Háskóla Íslands að Keldum og aðjunkt við Læknadeild, Dr. Helgi Thorarensen, prófessor við Háskólann á Hólum og Dr. Oddur Þ. Vilhelmsson, dósent við Háskólann á Akureyri. Styrktaraðilar verkefnisins voru Háskólasjóður Eimskipafélags Íslands, Rannís, AVS rannsóknarsjóðurinn, Rannsóknanámssjóður og Rannsóknarsjóður Háskóla Íslands.

Um doktorsefnið
Hólmfríður Sveinsdóttir er fædd þann 8. febrúar 1972 á Sauðárkróki. Hólmfríður lauk stúdentsprófi frá náttúrufræðibraut Fjölbrautarskóla Norðurlands vestra árið 1993. Árið 1995 hóf Hólmfríður nám í næringarfræði við Justus-Liebig háskólann í Giessen í Þýskalandi og lauk dipl. oec. troph gráðu í næringarfræði sem samsvarar meistaragráðu í næringarfræði árið 2001. Meistaraverkefni Hólmfríðar fjallaði um H+-ATPasa í maísplöntum. Hólmfríður er með löggildingu sem næringarfræðingur.

Hólmfríður hóf doktorsnám við matvæla- og næringarfræðideild Háskóla Íslands árið 2002. Hún er dóttir hjónanna Sveins Rúnars Sigfússonar, verslunarmans og Heiðrúnar Friðriksdóttur, læknaritara. Hólmfríður er gift Stefáni Friðrikssyni dýralækni og saman eiga þau þrjú börn, Friðrik Þór, Herjólf Hrafn og Heiðrúnu Erlu.

Þess má svo geta í lokin að Hólmfríður mun hefja störf hjá Matís á Sauðárkróki í næstu viku. Er þetta enn eitt dæmið hvernig Matís stuðlar að því, með starfsemi sinni úti á landi, að þekking skili sér í heimabyggð.

Þann 12. maí Hótel Sögu við Hagatorg

Norræna nýsköpunarmiðstöðin, Norræna Atlantssamstarfið, Norræna ráðherranefndin, undir formennsku Íslands og Matís bjóða þér að taka þátt í ráðstefnu og umræðum um nýsköpun í sjávarútvegi.Helstu viðfangsefnin eru:Helstu viðfangsefnin eru:

• Stuðningur við nýsköpun og norræn samlegðaráhrif / Innovation systems and Nordic synergies
• Veiðafæri / Fishing gear
• Eldi / Aquaculture
• Framleiðsla og dreifing / Processing and distributions
• Líftækni sjávar þ.m.t. þörungar / Marine biochemicals including Algae Technology

Á ráðstefnunni verða viðurkenndir fyrirlesarar frá Kanada og Norðurlöndunum. Hluti ráðstefnunnar verða pallborðsumræður sem gefa gullið tækifæri til að koma á framfæri sínum sjónarmiðum um áherslur í og stuðning við nýsköpun.

Þetta er ráðstefna sem að þú vilt ekki missa af!

Ráðstefnan verður sett af sjávarútvegs- og landbúnaðarráðherra

Ráðstefnan fer fram á ensku. 

Þátttaka er ókeypis! Tekið er á móti skráningum á meðan húsrúm leyfir.

Dr. Alfredo Aguilar framkvæmdastjóri líftæknihluta Matvælaáætlunar 7. rammaáætlunarinnar ESB er nú staddur á Íslandi. Hann hefur m.a. heimsótt Matís þar sem hann hélt kynningu á rammaáætluninni sl. þriðjudag.

Dr. Alfredo fékk auk þess góða kynningu á starfsemi Matís, þá sérstaklega á líftæknihluta starfsemi fyrirtækisins, en starfsemi Matís á þessu svið er í fremstu röð í heiminum. Dr. Alfredo hélt auk þess kynningu hjá Rannís á styrkjum 7. markáætlunar Evrópusambandins til rannsókna og nýskpunar á sviði matvæla, landbúnaðar, sjávarútvegs og líftækni.

Mun hann dvelja á Íslandi fram yfir helgi og mun á þeim tíma gera sér lítið fyrir og ganga á Hvannadalshnúk með starfsmönnum Matís en sú ferð verður farinn laugardaginn 2. maí.

Mikill fengur er af Dr. Alfredo hingað til lands enda er þekking hans á styrktarmálum 7. markáætlunar Evrópusambandins til rannsókna og nýskpunar á sviði matvæla, landbúnaðar, sjávarútvegs og þá sérstaklega líftækni einstök.

Áhugaverð ráðstefna sem Matís tekur þátt í að skipuleggja á vegum verkefnis sem styrkt er af NICe sjóðnum.

Þema ráðstefnunnar er:

Auðkenni norrænna matvæla (ID-NorFood)

Á  ráðstefnunni er fjallað um “terroir” og er þá átt við landsvæði eða hérað með sama landslagi og veðurfari sem hafi áhrif á sérstök einkenni matvæla frá staðnum. Lögð er áhersla á að skoða norræn áhrif landslags og veðurfars á einkenni norrænna matvæla einnig verður fjallað um aukið virði af merkingum matvæla m.t.t. til svæðisbundinna einkenna. 

Ráðstefnan er haldin í Osló 12. maí nk.

Meira um efnið http://www.id-norfood.life.ku.dk/

Nánari upplýsingar veitir Emilia Martinsdóttir, emilia.martinsdottir@matis.is.

Steingrímur J. Sigfússon, sjávarútvegs- og landbúnaðarráðherra, hefur ákveðið, eftir að hafa lagt málið fyrir ríkisstjórn nú í morgun, að Matís ohf. flytji starfsemi sína í nýtt húsnæði um næstu áramót.

Í samræmi við það markmið að fjölga störfum í byggingariðnaði var Framkvæmdasýslu ríkisins falið að auglýsa eftir leiguhúsnæði fyrir Matís ohf. sem nú starfar á þremur stöðum víðs vegar um borgina.

Ákveðið var síðan að velja byggingarfélagið Mótás sem boðið hafði fram leigu á 3.800 fermetra húsnæði að Vínlandsleið 12, Reykjavík.  Húsnæðið sem nú er fokhelt er á þremur hæðum ásamt kjallara og mun leigusali innrétta húsnæðið og skila því fullfrágengnu að utan sem innan.  Leigusali hefur áætlað að mannaflaþörf, þ.m.t. afleidd störf við að fullgera húsnæðið í samræmi við húslýsingu Matís, séu um 200 ársverk.

Með lögum nr. 68/2006 um stofnun Matvælarannsókna hf.  heimilaði Alþingi að stofna hlutafélag um rekstur Rannsóknastofnunar fiskiðnaðarins, Matvælarannsókna Keldnaholti, sbr. samstarfssamning milli Iðntæknistofnunar og Landbúnaðarháskólans, og rannsóknastofu Umhverfisstofnunar. Í athugasemdum við frumvarpið var lögð rík áhersla á að fyrirtækinu yrði gert kleift að sameina undir einu þaki starfsemi stofnananna sem verið var að sameina.

Félagið – Matís ohf. – tók til starfa 1. janúar 2007.

Matís og HR bjóða upp á áhugavert nám fyrir hráefnisframleiðendur. Námið er stutt en hnitmiðað og nýtist bændum, smábátasjómönnum, skotveiðifólki og öðrum hráefnisframleiðendum hjá fyrirtækjum eða með eigin rekstur.

MARKMIÐ:
Markmið námsins er að efla hráefnisframleiðendur í vöruþróun og hráefnisnýtingu. Áhersla verður m.a. á vöruþróun og nýsköpun frá hráefni til neytenda. Meðal annars verður fjallað um hvernig koma má auga á tækifæri, hvernig tækifæri er flutt af hugmyndastiginu á þróunarstigið, stjórnun nýrrar þróunar og loks hvernig nýrri þróun er komið á framfæri í formi nýs vöru‐ eða þjónustuframboðs.

HVERJIR:
Námið er ætlað bændum, smábátasjómönnum, skotveiðifólki og öðrum hráefnisframleiðendum með eigin rekstur.

EFNISTÖK:
1. Markaðskönnun, 29. apríl kl. 13‐17
‐ Valdimar Sigurðsson HR

2. Lagaumhverfi og matvælaöryggi, 6. maí kl. 9‐17
‐ Franklin Georgsson og Margeir Gissurarson Matís

3. Vöruþróun og nýsköpun, 13. og 20. maí kl. 9‐17
– Marína Candi HR, Sjöfn Sigurgísladóttir og Þóra Valsdóttir Matís

4. Framleiðslu‐ og aðfangastjórnun, 27. maí kl. 9‐17
– Hlynur Stefánsson HR og Sveinn Margeirsson Matís

5. Markaðssetning eigin vöru, 3. júní kl. 9‐17
– Valdimar Sigurðsson HR, Gunnþórunn Einarsdóttir og Guðmundur Gunnarsson Matís

DAGSETNING:
Námið hefst 29. apríl og lýkur 3. júní.

VERÐ:
129.000 kr.

UPPLÝSINGAR OG SKRÁNING:
simi: 599 6200
www.opnihaskolinn.is
stjornmennt@opnihaskolinn.is
www.matis.is/opni-haskolinn

Vorráðstefna Matís var haldin 16. apríl sl. Margur áhugaverður fyrirlesarinn hélt erindi á ráðstefnunni og eru erindin nú komin á heimasíðu Matís.

Samhliða fyrirlestrum var sýning á afrakstri samstarfs Matís og fjölda fyrirtækja. Má nefna þar nefna Háskólann í Reykjavík, Háskóla Íslands, Godthaab frá Vestmannaeyjum og Norðurskel svo fáein séu nefnd á nafn.

Óhætt er að segja að ráðstefnan hafi tekist vel og þeir sem sóttu hana heim orðið margs vísari.

Sjávarútvegs- og landbúnaðarráðherra, Steingrímu J. Sigfússon setti ráðstefnuna að viðstöddu fjölmenni.

Fyrirlestrar (pdf):
Þekkingarvísitala – Friðrik Friðriksson, formaður stjórnar Matís
Nýsköpun og afrakstur – Sjöfn Sigurgísladóttir, forstjóri Matís
Hundruðaföld virðisaukning; eru möguleikarnir endalausir? – Hörður Kristinsson, Matís, University of Florida
Sjávarútvegur; markaðsmál, ímynd, vöruþróun og vinnsla – Kristján Hjaltason, ráðgjafi
Líftækni framtíðarinnar – Jakob Kristjánsson og Ragnar Jóhannsson, Matís
Tækifæri í  íslenskum landbúnaði – Guðjón Þorkelsson, Matís
Leiðin til lífsgæða – Hjalti Þór Vignisson, bæjarstjóri á Höfn í Hornafirði
Hvert á að sigla til að ná í besta aflann? – Steingrímur Gunnarsson, Trackwell
Fjármögnun nýsköpunar og rannsókna í Noregi – Friðrik Sigurðsson, Sintef MRB AS
Nýting í nýju ljósi – Sveinn Margeirsson og Sigurjón Arason, Matís
Íslensk matvæli: upplifun, menning, sérstaða  – Brynhildur Pálsdóttir, Listaháskóli Íslands, Matís
Menntun í matvælum – framtíðin í faginu – Inga Þórsdóttir, Háskóli Íslands