Dr. Kolita Kamal Jinadasa, ráðuneytisstjóri sjávarútvegs í Srí Lanka, heimsótti nýverið Matís í tengslum við alþjóðlegan fund um fiskveiðistjórnun sem haldinn var í Hörpu. Heimsóknin markaði ákveðinn hring í ferli hans, en hann vann rannsóknarverkefni hjá Matís á árunum 2010–2011 þegar hann stundaði nám við Sjávarútvegsskóla Sameinuðu þjóðanna (nú GRÓ).
Dvöl Jinadasa á Íslandi reyndist honum mótandi og hefur haft veruleg áhrif á störf hans og sýn á þróun sjávarútvegs. Í viðtölum hefur hann lagt áherslu á mikilvægi þeirrar praktísku reynslu og rannsóknaumhverfis sem hann kynntist hjá Matís, þar sem hann fékk innsýn í fiskveiðistjórnun, gæðastjórnun og nýtingu hráefnis – þar á meðal þróun hliðarafurða úr sjávarafla.
„Ísland getur deilt þekkingu sinni, reynslu og áætlunum í fiskveiðistjórnun með heiminum,“ segir Jinadasa í viðtali í Morgunblaðinu sem birtist í vikunni. Hann nefnir einnig að það hafi vakið sérstaklega áhuga hans hvernig hægt var að nýta affall í hliðarafurðir.
Í dag gegnir Jinadasa lykilhlutverki í uppbyggingu sjálfbærs sjávarútvegs í Srí Lanka, þar sem áhersla er lögð á fæðuöryggi, aukna verðmætasköpun og bætt stjórnunarkerfi. Þar nýtir hann meðal annars þá þekkingu og reynslu sem hann öðlaðist á Íslandi.
Heimsókn ráðuneytisstjórans undirstrikar mikilvægi Matís sem alþjóðlegs samstarfsaðila í rannsóknum og þekkingarmiðluní sjávarútvegi, þar sem fyrirtækið gegnir lykilhlutverki í að miðla íslenskri þekkingu og styðja við þróun sjálfbærra matvælakerfa á heimsvísu.
Mynd: Dr. Kolita Kamal Jinadasa (í miðju) ásamt Jónasi R. Viðarssyni (til vinstri), sviðsstjóra rannsókna hjá Matís, og Oddi Má Gunnarssyni (til hægri), forstjóra Matís.